Færslur: 2016 Nóvember

29.11.2016 23:45

Litlanes ÞH 3 sjósett eftir breytingar

Litlanes ÞH 3 , sem er í eigu Fagranes útgerð ehf á Þórshöfn var sjósett í dag eftir miklar breytingar hjá Siglufjarðar Seig á Siglufirði. Var báturinn meðal annars lengdur , sett á hann perustefni og byggt yfir hann .

Litlanes ÞH var smíðað hjá Sólplasti í Sandgerði árið 2008 og bar í upphafi nafnið Muggur KE 57 . 

Ég smellti af nokkrum myndum þegar að Litlanes ÞH var sjósett og má sjá þær hér fyrir neðan , en neðstu myndina tók Sigurður Helgi Sigurðsson fyrir nokkrum árum en á henni má sjá Litlanes ÞH eins og báturinn leit út í upphafi.

 
 
 
 
 
 
 
 

Hér fyrir neðan má sjá Mugg KE 57 óbreyttann , eins og Litlanes ÞH hét þá,  en myndin er tekin á Siglufirði fyrir nokkrum árum .

Mynd : Sigurður Helgi Sigurðsson 

 

28.11.2016 21:45

Tjaldur SH 270

Tjaldur SH 270 landaði á Siglufirði í morgun um 300 körum eða rúmum 85 tonnum . Uppistaða aflans , um 70 tonn af þorski voru flutt vestur af Ragnari & Ásgeir í vinnslu hjá KG Fiskverkun en annar afli fór á Fiskmarkað Siglufjarðar.

Hér fyrir neðan eru 4 myndir frá því morgun. 

 
 
 
Ásgeir Þór Ásgeirsson - Sendisveinn hjá Ragnari & Ásgeir 

 

27.11.2016 22:30

Valdimar GK 195

Það var nóg um að vera í Siglufjarðarhöfn í dag . Valdimar GK 195 landaði um 50 tonnum og Gullhólmi SH landaði um 20 tonnum . 

Einnig voru þrír Stakkavíkur bátar sem lönduðu ágætis afla í dag , ásamt Eskey ÓF sem var með um 5 tonn.

Hér fyrir neðan eru myndir af Valdimar GK frá því í dag.

 
 

26.11.2016 21:30

Tómas Þorvaldsson GK 10

Línuskipið Tómas Þorvaldsson GK 10 sem Þorbjörn hf gerir út , var í slipp í sumar og fram á haust þar sem unnið var að miklu viðhaldi á skipinu . 

Tómas Þorvaldsson hóf veiðar í lok september og landaði á Siglufirði 29. september og var fyrir norðan fram að verkfalli sjómanna. 

Eftir verkfall landaði Tómas á Djúpavogi , áður en hann kom til Siglufjarðar í vikunni sem leið og landaði rúmum 50 tonnum .

 

Myndin hér fyrir ofan var tekin í október þegar að Tómas Þorvaldsson GK hélt á ný til veiða að löndun lokinni.

25.11.2016 12:35

Lukka ÓF 57

Leiðinda veðurfar hefur sett strik í reikninginn hjá smærri bátunum sem gera út frá Siglufirði síðustu daga og ekki bætti það úr sök þegar að verðin á mörkuðunum féllu . 

Hér er Lukka ÓF 57 að landa á Siglufirði í byrjun vikunnar og í bakgrunni má sjá Bátahúsið og til vinstri Sigló Hótel til hægri á myndinni.

 

23.11.2016 22:15

Örvar SH 777 landar á Siglufirði

Eftir verkfall sjómanna og brælu síðustu daga hefur lifnað yfir Siglufjarðarhöfn á ný . Stór línuskipin eru komin af stað aftur og eru komin norður fyrir land . Örvar SH 777 landaði í gærdag ágætisafla á Siglufirði og í dag var Tjaldur SH til löndunar . 

Hér fyrir neðan eru tvær myndir af Örvari SH sem ég tók í gær eftir að löndun lauk.

 
 

22.11.2016 20:20

Snæfell EA 310 landar á Dalvík

Átti leið í gegnum Dalvík í gærmorgun og sá að Snæfell EA 310 var að landa á Dalvík . Ekki er mér kunnugt um aflabrögð .

Snæfell EA var smíðað árið 1968 í Syvikgrend í Noregi og hét upphaflega Stella Kristína , síðar Sléttbakur EA , svo Akureyrin EA áður en nafninu var breytt í Snæfell EA.

 

20.11.2016 22:30

Áskell Egilsson EA - Glæsilegur bátur !

Á ferð minni um Akureyri í síðasta mánuði , sá ég þennan glæsilega bát , Áskel Egilsson . Ég hef ekki farið leynt með dálæti mitt á gömlu eikarbátunum sem gerðir hafa verið upp og fengið nýtt líf og má segja að Áskell Egilsson EA sé verðandi mubla. Báturinn var smíðaður árið 1975 hjá Bátasmiðjunni Vör á Akureyri og bar í upphafi nafnið Vöttur SU 3.

 

Á vef Árna Björns Árnasonar , ww.aba.is segir meðal annars um Áskel Egilsson EA : " Á haustdögum 2015 var bátinn að finna í Húsavíkurhöfn en 17. október 2015 var hann dreginn til Akureyrar til nýrra eigenda.
Frá þessum tíma eru eigendur hans Egill Áskelsson, Halldór Áskelsson og Sævar Áskelsson allir frá Akureyri. 
Segja má að eplið falli sjaldan langt frá eikinni því að þeir Áskelssynir eru synir Áskels Egilssonar eins af eigendum Bátasmiðjunnar Varar hf. sem bátinn smíðaði. Hugmynd eigenda er að koma bátnum í upprunalegt horf og nota hann til eigin þarfa. Fyrsta verk nýrra eiganda var að fjarlægja hvalbakinn af bátnum. Stýrishúsið, sem er úr stáli, var ryðbarið, sandblásið og málað. Allt var það síðan einangrað að innan og klætt með  Fibo-Trespo og það innréttað á svipaðan hátt og áður var.
Aftan á stýrishúsið var smíðaður ryðfrír stigi og ofan á þak þess rekkverk úr ryðfríum rörum og frá því gengið. Afgasrör vélar var endurnýjað og til verksins notað ryðfrítt rör. Lunningsplanki úr eik var endurnýjaður frá stefni að skut eða með öðrum orðum allan hringinn.
Tveggja pila rekkverk úr ryðfríum stálrörum var smíðað og frá því gengið ofan á lunningu.  Rafbúnaður bátsins var að miklum hluta endurnýjaður. Meðal annars voru rafmagnstöflur endurnýjaðar svo og siglingaljós. Annað í rafbúnaði bátsins sem betur mátti fara var lagfært.
Allur var báturinn málaður frá kili að masturstoppum og honum gefið nafnið "Áskell Egilsson" til minningar um föður þeirra sem að verkinu stóðu.
Meiri hluti þessarar vinnu var framkvæmdur á hliðargörðum slippsins á Akureyri og var hann sjósettur 9. ágúst 2016. 
"

19.11.2016 09:50

Katrín GK og Gullhólmi SH

Leiðinda veður hefur verið hér fyrir norðan og hafa Katrín GK og Gullhólmi SH legið við bryggju á Siglufirði frá því að verkfall sjómanna skall á . 

 

 

17.11.2016 21:55

Múlaberg SI 22

Hér er Múlaberg SI 22 við bryggju á Siglufirði á sunnudaginn síðasta en Múlaberg SI var rækilega bundið við bryggju á meðan verkfalli sjómanna stóð.

 

16.11.2016 19:20

Mánaberg ÓF 42

Mánaberg ÓF kom inn til Siglufjarðar á föstudaginn síðasta vegna verkfalls sjómanna og var landað upp úr skipinu á laugardeginum um 200 tonnum . 

Mánaberg ÓF hélt svo á ný til veiða í gærkveldi eftir að samningar náðust á milli sjómanna og útgerðarmanna.

 

14.11.2016 21:14

Sigurbjörg ÓF 1 - Myndasyrpa frá löndun

Landað var úr Sigurbjörg ÓF 1 á fimmtudaginn í síðustu viku, rúmlega 9.300 kössum eða 200 tonnum af frosnum afurðum. Var uppistaða aflans þorskur , eða tæp 120 tonn.

Sigríður Guðrún Hauksdóttir tók nokkrar myndir þegar að löndunarlið Fiskmarkaðs Siglufjarðar var að störfum við löndun .

Mynd : Sigríður Guðrún Hauksdóttir

 

Mynd : Sigríður Guðrún Hauksdóttir

 

Mynd : Sigríður Guðrún Hauksdóttir

 

Mynd : Sigríður Guðrún Hauksdóttir

 

Mynd : Sigríður Guðrún Hauksdóttir

 

Mynd : Sigríður Guðrún Hauksdóttir

 

Mynd : Sigríður Guðrún Hauksdóttir

 

 

13.11.2016 19:40

Katrín GK 266

Hér er Stakkavíkur báturinn Katrín GK að leggjast að bryggju á Siglufirði fyrir nokkrum dögum síðan .

Katrín GK kemst eflaust ekki á "topp 10" listann yfir fallegustu bátana en strákarnir um borð fiska þó vel.

 

11.11.2016 21:00

Þinganes ÁR 25

Fyrir mánuði síðan birti ég tvær myndir af Þinganes ÁR 25 þar sem verið var að mála skipið . Myndina hér fyrir neðan tók ég 21.október en þá var búið að mála skipið og stuttu síðar hélt það svo af stað til veiða en Þinganes ÁR er búið að landa þrívegis á Hornafirði áður en verkfallið skall á.

 

09.11.2016 21:10

Sólberg ÓF 1 - Síðasta púslið

Hjalti Gunnarsson sendi mér þrjár myndir sem hann tók í dag í Tersan skipasmíðastöðinni í Tyrklandi þegar verið var að hífa afturgálgann á Sólbergið . Hjalti verður vélstjóri um borð og er við eftirlit með smíðinni en í tölvupóstinum frá Hjalti sagði " Sìðasta pùslið komið à sinn stað  "

Glæsilegt !

Mynd : Hjalti Gunnarsson

 

Mynd : Hjalti Gunnarsson

 

Mynd : Hjalti Gunnarsson

 

Flettingar í dag: 276
Gestir í dag: 38
Flettingar í gær: 481
Gestir í gær: 64
Samtals flettingar: 2268210
Samtals gestir: 522098
Tölur uppfærðar: 23.11.2017 09:21:26

Nafn:

Guðmundur Gauti Sveinsson

Farsími:

868-9333

Afmælisdagur:

25.08.1983

Heimilisfang:

Hávegur 26

Staðsetning:

Siglufjörður

Tenglar